ଏହି କମ୍ପାନୀରେ କାର୍ଯ୍ୟ କରୁଥିବା ବାହାର ରାଜ୍ୟର ଶ୍ରମିକ ମାନଙ୍କ ଦରମା ବୃଦ୍ଧି ସହିତ ସେମାନଙ୍କୁ ଦିଆଯାଉଛି ଅଧିକ ସୁବିଧା। ମାତ୍ର ସ୍ଥାନୀୟ ଯୁବକମାନଙ୍କୁ ଏଠାରେ ନିର୍ଯ୍ୟାତନା ଦିଆଯାଉଥିବା ସେମାନେ ଅଭିଯୋଗ କରିଛନ୍ତି। ଯାହାକୁ ନେଇ କମ୍ପାନୀ ର ମେସ୍ ସମ୍ମୁଖରେ ସେମାନେ ଧାରଣା ଦେଇଛନ୍ତି। ଦୀର୍ଘ ଦିନ ହେଲା କମ୍ପାନୀ କତ୍ତୃପକ୍ଷ ସ୍ଥାନୀୟ ଶ୍ରମିକଙ୍କ ଦରମା ବୃଦ୍ଧି କରୁ ନଥିବା ବେଳେ ଏ ସମ୍ପର୍କରେ ପଚାରିଲେ ସେମାନଙ୍କୁ ଛଟେଇ କରାଯାଉଥିବା ସେମାନେ ଅଭିଯୋଗ କରିଛନ୍ତି। କମ୍ପାନୀର କାର୍ଯ୍ୟାଳୟ ବନ୍ଦରର ନିଷିଦ୍ଧାଞ୍ଚଳରେ ରହୁଥିବାରୁ ଶ୍ରମିକ ମାନଙ୍କୁ ପ୍ରତିବାଦ କରିବାର ସୁଯୋଗ ମଧ୍ୟ ମିଳୁନାହିଁ। ଗତ ତିନିଦିନ ତଳେ ବାହାର ରାଜ୍ୟର ଶ୍ରମିକ ମାନଙ୍କ ଦରମା ବୃଦ୍ଧି କରାଯାଇଛି , ମାତ୍ର ଗତ ୪ ମାସ ତଳେ ଦରମା ବୃଦ୍ଧି ପାଇଁ କମ୍ପାନୀକୁ ଚିଠି କରାଯାଇଥିଲେ ମଧ୍ୟ ସ୍ଥାନୀୟ ଶ୍ରମିକଙ୍କ ଦରମା ବୃଦ୍ଧି କରାଯାଇନାହିଁ। ଏହାକୁ ନେଇ ଆଜି ପାରାଦ୍ଵୀପ ଜେ ବି କଲୋନୀ ରେ ଥିବା ଚେନ୍ନାଇରାଧା କମ୍ପାନୀ ର ମେସ୍ ସମ୍ମୁଖରେ ଶତାଧିକ ଶ୍ରମିକ ସେମାନଙ୍କ ଦରମା ବୃଦ୍ଧି ଓ ଛଟେଇ ଶ୍ରମିକ କର୍ମଚାରୀଙ୍କୁ ପୁନଃ ନିଯୁକ୍ତି ଦାବିରେ ଧାରଣା ଦେଇଛନ୍ତି। ଦାବୀ ପୂରଣ ନହେବା ପର୍ଯ୍ୟନ୍ତ ଧାରଣା ଦିଆଯିବ ବୋଲି ଶ୍ରମିକମାନେ ପ୍ରକାଶ କରିଛନ୍ତି।
