ଅନୁଗୁଳ ହରିମଉରୀ ଛକରେ ଦୁଇ ଭାଇଙ୍କୁ ଭୁଜାଲିରେ ଆକ୍ରମଣ ପରେ ଜଣେ ଭାଇଙ୍କ ମୃତ୍ୟୁ ଘଟଣାରେ ପୁଲିସ ତିନି ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି । ତେବେ ମାତ୍ର ଦୁଇ ହଜାର ଟଙ୍କା ପାଇଁ ଏଭଳି ହତ୍ୟାକାଣ୍ଡ ହୋଇଥିବା ପୁଲିସ ସୂଚନା ଦେଇଛି I
ସୂଚନା ଅନୁସାରେ ଏହି ଘଟଣାର ମୁଖ୍ୟ ଅଭିଯୁକ୍ତ ରାହୁଲ ଅନୁରାଗ ସାହୁଙ୍କ ଏକ ପୋଷା କୁକୁର ଦେହ ଖରାପ ଥିବାରୁ ତାକୁ ସୌରଭ ବାସାକଙ୍କ ଆମ୍ବୁଲାନ୍ସରେ କଟକ ନେଉଥିଲେ । ଆମ୍ବୁଲାନ୍ସ ବାବଦକୁ ରାହୁଲ ୨ ହଜାର ଟଙ୍କା ସୌରଭଙ୍କୁ ଦେଇ କୁକୁର ନେଇ ଯାଉଥିବା ବେଳେ ବାଟରେ ଆମ୍ବୁଲାନ୍ସ ଖରାପ ହୋଇଥିଲା । ଆମ୍ବୁଲାନ୍ସ ଖରାପ ହେବାରୁ ରାହୁଲ ଆଉ ଏକ ଆମ୍ବୁଲାନ୍ସ ନେଇ କୁକୁରର ସ୍ବାସ୍ଥ୍ୟ ପରୀକ୍ଷ କରି ଯାଇଥିଲେ I ସେଠାରୁ ଫେରିବା ପରେ ରାହୁଲ ଦେଇଥିବା ୨ ହଜାର ଟଙ୍କା ସୌରଭଙ୍କୁ ଫେରେଇବା ପାଇଁ କହିଥିଲେ I ଏହି କଥାକୁ ନେଇ ଉଭୟଙ୍କ ମଧ୍ୟରେ ସାମାନ୍ୟ ଝଗଡା ହୋଇଥିଲା I ତେବେ ରାତିରେ ରାହୁଲ ତାଙ୍କର କିଛି ଲୋକ ନେଇ ସୌରଭ ଓ ତାଙ୍କ ଭାଇ ସୌଭାଗ୍ୟ ବାସାକଙ୍କୁ ହରିମଉରୀ ଛକ ନିକଟକୁ ଡାକିଥିଲେ I ଦୁଇ ଭାଇ ଆସିବା ପରେ ଉଭୟ ଗୋଷ୍ଠୀଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ରାହୁଲ ଓ ତାଙ୍କ ସହଯୋଗୀ ମାନେ ଚାପଡ଼ ଓ ଭୁଜାଲିରେ ଆକ୍ରମଣ କରିବାରୁ ଦୁଇ ଭାଇ ଗୁରୁତର ହୋଇଥିଲେ I କଟକ ନେବା ବାଟରେ ସାନ ଭାଇ ସୌଭାଗ୍ୟଙ୍କ ମୃତ୍ୟୁ ହୋଇଥିଲା । ଏହି ଘଟଣାରେ ପୁଲିସ ଆଜି ମୁଖ୍ୟ ଅଭିଯୁକ୍ତ ରାହୁଲ ଅନୁରାଗ ସାହୁ ସମେତ ମନୋଜ ବେହେରା ଓ ସମ୍ବିତ ସାହୁକୁ ଗିରଫ କରିଛି I ସେମାନଙ୍କ ନିକଟରୁ ହତ୍ୟାରେ ବ୍ୟବହୃତ ଚାପଡ, ୪ ଟି ମୋବାଇଲ ଫୋନ ଏବଂ ଏକ ଆମ୍ବୁଲାନ୍ସ ଜବତ କରିଛି ।
